افغانستان یونائیٹڈ فرنٹ نے دعویٰ کیا ہے کہ اس نے گزشتہ ایک ماہ کے دوران ملک کے 14 صوبوں میں طالبان کے خلاف کم از کم 43 کارروائیاں کیں، جن میں 74 طالبان ارکان ہلاک اور 35 زخمی ہوئے۔
افغان انٹرنیشنل کے مطابق یونائیٹڈ فرنٹ نے یکم اگست سے اگست کے اختتام تک جاری رہنے والی کارروائیوں کی تفصیلات جاری کرتے ہوئے کہا کہ حملوں میں ان طالبان ارکان کو نشانہ بنایا گیا جن پر افغان شہریوں کی گرفتاری، تشدد اور ہراساں کرنے کے الزامات ہیں۔
یونائیٹڈ فرنٹ کے ترجمان ہلال کاکڑ نے ویڈیو بیان میں بتایا کہ سب سے اہم کارروائی قندھار میں طالبان کے ایک فوجی کور پر براہِ راست حملہ تھا، جبکہ سب سے بڑا حملہ ہلمند کے ضلع نوزاد میں ایک فوجی اڈے پر کیا گیا،کارروائیوں میں طالبان کو بھاری جانی نقصان پہنچا جبکہ فرنٹ کے جنگجوؤں نے کچھ گولہ بارود بھی قبضے میں لیا،فرنٹ افغان عوام کو طالبان سے نجات دلانے اور ایک خوشحال و آزاد افغانستان کے قیام کے لیے جدوجہد جاری رکھے گا۔
یونائیٹڈ فرنٹ نے کہا ہے کہ طالبان حکومت کے خاتمے اور عوام کی مرضی پر مبنی نظام حکومت کی بحالی تک وہ ہر قربانی دینے کے لیے تیار ہے فرنٹ نے گزشتہ ماہ قندھار، ہلمند، بادغیس، غور اور فریاب سمیت مختلف علاقوں میں حملوں کی ویڈیوز بھی جاری کیں، جن میں مبینہ طور پر ہلاک طالبان ارکان کی لاشیں دکھائی گئی ہیں۔
سابق افغان فوجی کمانڈر سمیع سادات کی قیادت میں یونائیٹڈ فرنٹ نے یکم اگست کو طالبان اور دیگر مسلح گروہوں کے خلاف فوجی کارروائیوں کے آغاز کا اعلان کیا تھا۔