گوجرانوالہ کی پیپلز کالونی میں افسوسناک حادثے کے دوران ستھرا پنجاب کی ٹریکٹر ٹرالی نے 5 سالہ کمسن بچی کو کچل دیا، جس کے نتیجے میں بچی موقع پر ہی جاں بحق ہوگئی۔
پولیس کے مطابق 5 سالہ منہا شہزادی گلی میں کھیل رہی تھی کہ ٹریکٹر ڈرائیور نے گاڑی ریورس کی۔ اس دوران بچی ٹریکٹر ٹرالی کی زد میں آکر شدید زخمی ہوئی اور موقع پر ہی دم توڑ گئی۔
حادثے کے فوراً بعد ڈرائیور ٹریکٹر ٹرالی چھوڑ کر موقع سے فرار ہوگیا، جس کے باعث علاقے میں غم کی فضا پھیل گئی۔
پولیس نے حادثے میں ملوث ستھرا پنجاب کی ٹریکٹر ٹرالی قبضے میں لے کر تھانے منتقل کردی ہے جبکہ فرار ڈرائیور کی تلاش کے لیے کارروائی جاری ہے۔
اہلخانہ نے کمسن بچی کی ہلاکت پر شدید غم کا اظہار کرتے ہوئے مطالبہ کیا ہے کہ ذمہ دار ڈرائیور کو گرفتار کرکے قانون کے مطابق کارروائی کی جائے اور انہیں انصاف فراہم کیا جائے۔