نائب وزیراعظم و وزیر خارجہ سینیٹر اسحاق ڈار نے ایران کے وزیر خارجہ سید عباس عراقچی سے ٹیلیفون پر رابطہ کیا،جس میں دونوں رہنماؤں نے خطے کی تازہ صورتحال پر تبادلہ خیال کیا۔
دفتر خارجہ کے مطابق نائب وزیراعظم و وزیر خارجہ سینیٹر محمد اسحاق ڈار نے اسلامی جمہوریہ ایران کے وزیر خارجہ سید عباس عراقچی سے ٹیلیفون پر گفتگو کرتے ہوئے خطے کی بدلتی ہوئی صورتحال اور علاقائی امن و استحکام سے متعلق امور پر تبادلہ خیال کیا، دونوں وزرائے خارجہ نے موجودہ علاقائی صورتحال کا جائزہ لیا اور باہمی دلچسپی کے مختلف امور پر خیالات کا تبادلہ کیا۔
دفتر خارجہ کے مطابق اس موقع پر اسحاق ڈار نے اس بات پر زور دیا کہ تمام فریق جون 2026 میں طے پانے والی اسلام آباد مفاہمتی یادداشت (Islamabad MoU) کے مطابق کشیدگی میں کمی لانے، تحمل کا مظاہرہ کرنے اور تنازعات کو مزید بڑھنے سے روکنے کے لیے اقدامات کریں خطے میں پائیدار امن اور استحکام کے قیام کے لیے مذاکرات اور سفارتکاری ہی واحد مؤثر اور قابلِ عمل راستہ ہیں، لہٰذا تمام متعلقہ فریقوں کو اختلافات کے حل کے لیے بات چیت کو ترجیح دینی چاہیے۔
دفتر خارجہ کے مطابق نائب وزیراعظم نے علاقائی امن و استحکام کے فروغ کے لیے پاکستان کے تعمیری کردار کو دہراتے ہوئے کہا کہ پاکستان مستقبل میں بھی خطے میں امن، استحکام اور سفارتی کوششوں کو آگے بڑھانے کے لیے اپنا مثبت کردار ادا کرنے کے لیے تیار ہے۔
دفتر خارجہ کے مطابق دونوں رہنماؤں نے خطے کی صورتحال پر قریبی رابطے برقرار رکھنے اور باہمی مشاورت کا سلسلہ جاری رکھنے پر بھی اتفاق کیا۔