پاکستان کی سمندری خوراک (سی فوڈ) کی برآمدات مالی سال 2025-26 کے دوران ریکارڈ سطح پر پہنچ گئی ہیں اور پہلی بار 50 کروڑ ڈالر کی حد عبور کرتے ہوئے 56 کروڑ 80 لاکھ ڈالر ہوگئی ہیں۔
سی فوڈ کا شعبہ ملک کے لیے زرمبادلہ کے حصول، روزگار کے مواقع اور سرمایہ کاری کے فروغ کا اہم ذریعہ بنتا جا رہا ہے۔ اعداد و شمار کے مطابق گزشتہ دو سال کے دوران پاکستان کی سی فوڈ برآمدات میں تقریباً 40 فیصد اضافہ ریکارڈ کیا گیا ہے۔
مالی سال 2023-24 کے دوران پاکستان کی سی فوڈ برآمدات 40 کروڑ 60 لاکھ ڈالر تھیں، جو اگلے مالی سال 2024-25 میں بڑھ کر 48 کروڑ 90 لاکھ ڈالر ہوگئیں۔ اس کے بعد مالی سال 2025-26 میں برآمدات میں مزید نمایاں اضافہ ہوا اور یہ 56 کروڑ 80 لاکھ ڈالر کی ریکارڈ سطح تک پہنچ گئیں۔
ماہرین اور متعلقہ شعبے کے مطابق سی فوڈ کے معیار میں مزید بہتری، جدید پروسیسنگ، بہتر پیکیجنگ اور ویلیو ایڈیشن پر توجہ دے کر اس شعبے کی برآمدات میں مزید اضافہ کیا جاسکتا ہے۔
سی فوڈ برآمدات میں مسلسل اضافے سے نہ صرف ملک کے لیے قیمتی زرمبادلہ حاصل ہورہا ہے بلکہ اس شعبے سے وابستہ کاروباری سرگرمیوں، روزگار اور سرمایہ کاری کے مواقع میں بھی اضافے کی توقع کی جارہی ہے۔